स्रोतका अनुसार, राजदूत रेले मंगलबार साँझ लैनचौरस्थित भारतीय दूतावासमा बिभिन्न दलका नेताहरुलाई बोलाएर परामर्श गरेका हुन् । ओली सरकार हटेकोमा आफू निकै खुसी भएको बताउँदै उनले उपस्थित नेताहरुलाई भनेका थिए– ‘भारत सफल भयो । अत्यन्त मेहनतका साथ केपी ओलीलाई सफलतापूर्वक सरकारबाट हटाइयो । अब दुईमहिनाभित्र प्रचण्डलाई भारतको भ्रमण गराउँछौँ । मधेशको समस्या, सीमाङ्नको समस्या पनि हल हुन्छ ।’
भेटमा सहभागी एक नेताले ‘सरकारबाट हटेपछि एकातिर केपी ओली, अर्कातिर शेरबहादुर देउवा हुन्छन् कसरी समस्याको हल हुन्छ ?’ भनी जिज्ञासा राखेका थिए ।
जबाफमा राजदूत रेले भने– ‘यो चिन्ता नगर्नुस, यो सबैकुरा मिलिसक्यो, हामी मिलाउँछौँ ।’ भारतीय राजदूत निकै ‘कन्फिडेन्स’ देखिएको भेटमा सहभागी मधेशी मोर्चाका एक नेताले बताए ।
भेटमा काँग्रेस, माओवादी तथा मधेशी मोर्चाका केही नेता सहभागी थिए । खासगरि, केपी ओली सरकार बनेपछि भारतीय राजदूतको दौडधुप केही कमी भएको थियो । ओली र राजदूत रेबीच दूरी नै बढेको थियो । राजदूतलाई आफ्नो पदीय मर्यादामा बस्न तथा परराष्ट्र मन्त्रालयमार्फत समय लिएर मात्र भेट्न आउन भनेपछि भारतीय राजदूत ओलीसँग झनै चिढिएका थिए । ओली सरकारलाई भारत र नेपालीस्थित भारतीय राजदूत रेले अस्तित्वको लडाईंसँग लिँदै आएका थिए ।
