युएई, बैशाख १४ । ओमानमा पुगेकी बुटवलकी सरिता राना मगरले उद्दारको लागि नेपाल सरकार समक्ष अपिल गरेकी छिन् । सरिता ३ महिना पहिला भिजिट भिषामा युएई हुँदै ओमान पुगेकी हुन् । बुटवल दीपनगरका एजेन्ट कुमार अधिकारीले उनलाई भिजिट भिषामा युएई पठाएका थिए । युएई आएको १७ दिन पश्चात राना मगरलाई ओमानको मस्कटमा रहेको एक लेबर रेक्रुटमेन्ट कम्पनीलाई बेचिएको थियो ।

फोनमा कुरा गर्दै उनले भनिन्, ‘एजेन्टलाई फोन गर्दा हामीलाई वास्ता छैन भन्छ । यहाँ खान नदिने, पानी पनि नदिने र पिट्ने गरेको छ । मलाई नेपालबाट पठाउने बेलामा दुबईमा राम्रो काम छ भनेर भनेका थिए अहिले म ओमनमा छु ।’

युएईमा रहेको लेबर रेक्रुटमेन्ट कम्पनीका एजेन्ट एलिशा श्रेष्ठ र सुजन भण्डारीले राना मगरलाई १२ हजार दिर्हाममा (झण्डै ३ लाख ५० हजार रुपैयाँ) ओमानमा रहेको रिक्रुटमेन्ट एजेन्सीलाई बेचेको बताईएको छ । सरिताका अनुसार एजेन्सीले उनलाई ३ महिनादेखि एउटा कोठामा थुनेर राखेको छ ।
आफुले नेपाल फर्काउन अनुरोध गर्दा ओमानको एजेन्सीले १ हजार ओमानी रियाल मागेको सरिताले बताईन् ।

सरितालाई नेपाली एजेन्ट कुमारले एयरपोर्टमा सेटिङ गरी युएई पठाएका थिए । नेपाल एयरपोर्टमा देखाउनका लागि नक्कली क्लिनर भिषा र दुबई एयरपोर्टमा देखाउन सक्कली भिजिट भिसा थमाएर सरितालाई युएई पुर्याईएको सरिताले बताईन् । ‘मलाई छिट्टो नेपाल फर्काउनुस प्लिज, नत्र म त यतै मर्छु होला’, सरिताले भनिन् ।