दाङ प्रदेशनम्वर ५ को राजधानीका लागि हरेक हिसाबले उपयुक्त हुँदाहुँदै पनि पछिल्लो समययता उक्त सम्भावना घटेर गइरहेको छ । राजनीतिक दल, उद्योग वाणिज्य संघ, नागरिक समाजलगायत जिल्लाका विभिन्न संघसंस्थाहरुको अभियानका कारण राजधानीका लागि चर्चामा रहेको दाङको सम्भावना यहाँका संघसंस्थाहरुकै निष्कृयताका कारण क्षिण बन्दै गइरहेको छ । हरेक मुद्दामा भेगीय लडाईमा होमिने यहाँको प्रवृत्तीकै कारण जिल्लाको सम्भावना कम हुँदै गएको नकार्न सकिदैन ।


उच्च अदालत दाङमा स्थापना गरेको विषयलाई गर्व मानेर त्यसको जस आफूले लिनमै यहाँका मुख्य दल नेपाली कांग्रेस, एमाले र माओवादी केन्द्र लागिरहेको समयमा यहाँका संघसंस्थाहरु पनि क्षेत्रीय लडाईमै व्यस्त देखिन्छन् । दलिय नेतृत्व जिल्ला आएको बेला आफ्नो क्षेत्रलाई राजधानीको केन्द्र तोक्न लविङ गर्ने कार्यमा यहाँका संघसंस्थाहरु पनि लागिपरेका छन् । प्रदेश नम्वर ५ को राजधानीका लागि सम्भावित रुपन्देहीले लुम्विनी अञ्चलका जिल्लामा मात्र नभई राप्तीको प्यूठान, रोल्पा, बाँके, बर्दियालगायतका क्षेत्रका सरोकारवालाहरुसँग ‘यस कारण रुपन्देहीको बुटवल राजधानी’ भन्ने बहसको थालनी गरिसकेको छ । अब उसको अभियान राजनीतिक दलहरुसँग छलफल गर्ने रहेको जानकारी आइरहँदा यहाँका सरोकारवालाहरु घोराही, तुलसीपुर र लमहीका नाममा लड्न छाडी दाङलाई राजधानी बनाउने अभियानमा जुट्नु आवश्यक छ । यहाँको सम्भावनाको खोजी गर्नु आवश्यक छ ।



दाङ प्रदेशनम्वर ५ को मात्र नभई सिंगो मुलुकको राजधानीका लागि छलफल चलाइएको जिल्ला हो । यहाँ जमिन, जल प्रसस्त मात्रामा छ । राजधानी घोषणापछि योजनाबद्ध विकासका लागि दाङ हरेक दृष्ट्रिले उपयुक्त छ । त्यतिमात्र नभई यो प्रदेशको मध्यविन्दूमा रहेको छ । सामरिक सुरक्षाका दृष्ट्रिले पनि यो भूमि उपयुक्त छ भन्ने कुरालाई बहसको विषय बनाई यहाँका सरोकारवालाहरुले छलफल थाल्नुपर्छ । अब कुनै पनि खालको दवावबाट दाङलाई राजधानी बनाउन सकिदैन । पहिलो प्रादेशीक सभाबाट राजधानीको नामाकरण र राजधानी तोक्ने कुरा संविधानमा उल्लेख भइसकेको अवस्थामा अब दाङले बर्दिया, बाँके, प्यूठान, कपिलबस्तु र अर्घाखाँचीसँग छलफल थाल्नुको विकल्प छैन । नत्र दाङ राजधानीका लागि उपयुक्त छ भन्ने कुरा चर्चामा मात्रै सीमित रहने छ ।