दाङ, बैशाख ८ । प्यूठानको भिंगृमा महिलाको पाठेघर खस्ने समस्याको निःशुल्क शल्यक्रिया शिविर सञ्चालन भएको छ । नेपालगञ्ज मेडिकल कलेज शिक्षण अस्पताल कोहलपुर बाँकेको प्राविधिक सहयोग तथा मध्यपश्चिमाञ्चल क्षेत्रीय स्वास्थ्य सेवा निर्देशनालय सुर्खेत, जिल्ला स्वास्थ्य कार्यालय प्यूठान र प्राथमिक स्वास्थ्य केन्द्र भिग्रीको आयोजनामा शिविर सञ्चालन गरिएको हो ।
बिहीबार शिविरको उद्घाटन गर्दै प्रमुख अतिथि प्रमुख जिल्ला अधिकारी यदुनाथ पौडेलले पाठेघर महिलाको महत्वपूर्ण तथा संवेदनशील अंग भएकाले यसको समस्या भएका बिरामीहरुलाई सेवा लिन आग्रह गर्नुभयो । वैशाख १२ गतेसम्म चल्ने शिविरमा रोल्पा र प्यूठान जिल्लाका पीडित महिलाले स्वास्थ्य सेवा लिने अपेक्षा आयोजकले गरेको छ ।
