दाङ, चैत २६ । प्रहरीले सुनबाट निर्मित गौतम बुद्धको मूर्तिसहित चार तस्करलाई नियन्त्रणमा लिएको छ । मूर्तिसहित सल्यान, रिम–१ का खड्क केसी, खिमलाल केसी, सिनवाङ–४ का छवि भण्डारी र सोही ठाउँका तुलबहादुर बुढालाई हर्नेटीबाट प्रहरीले नियन्त्रणमा लिएको हो ।
पक्राऊ परेका खिमलाल जीवन ज्योति मावि रिम–१ सल्यानमा कार्यरत स्थायी शिक्षक हुनुहुन्छ । त्यसैगरी पक्राउ परेका छवि भण्डारी तुलसीपुरस्थित किस्ट बैंकका सुरक्षागार्ड हुनुहुन्छ । स्रोतका अनुसार उहाँहरुलाई प्रहरीले बिहीबार राति करिव १० वजे हर्नेटीको स्कुल पछाडिबाट नियन्त्रणमा लिएको हो । स्कुल जंगल छेउमा छ । तस्करहरुले प्रहरीमाथि खुँडा प्रहार गर्न खोज्दा प्रहरीले चार राउन्ड गोली चलाउनुपरेको थियो । प्रहरीको गोली लागेर छवि भण्डारी घाइते भएका छन् । उहाँको खुट्टामा गोली लागेको र अवस्था सामान्य रहेको प्रहरीले जनाएको छ ।
प्रहरीका अनुसार मूर्ति केसीले बोक्नुभएको थियो । प्रहरीले भण्डारी र बुढाका साथबाट खुकुरी बरामद गरेको छ । उहाँहरुले सुनको मूर्ति कुनै मन्दिरबाट चोरेर ल्याएको हुनसक्ने प्रहरीको प्रारम्भिक अनुमान छ । प्रहरीका अनुसार नियन्त्रणमा लिइएको सुनको मूर्तिको तौल ९ किलो २ सय ग्राम छ, भने उचाई १० ईञ्च छ । प्रहरी स्रोतका अनुसार मूर्ति हल्लाउँदा भित्र केही वस्तु भएजस्तै गरी बज्ने छ । मूर्तिभित्र बहुमूल्य हिरा भएको बयान पक्राउ परेकाले दिएका छन् ।
यसरी बरामद गरियो २० करोडको मूर्ति
रिम–१ सल्यानका खिमलाल केसीको समूहले सुनको मूर्तिको कारोबार गर्छ भन्ने सुराकी दाङ प्रहरीले पाएको थियो । उहाँको पिछा भइरहेको थियो । प्रहरी आफै गौतम बुद्धको मूर्तिको ग्राहक बन्यो । प्रहरीले ग्राहक बनेर मूर्तिको मूल्यमा बार्गेनिङ गरे । तस्करले मूर्तिको मूल्य २५ करोड रुपैयाँ भने । लामो समयसम्मको मोवाइलमा कुराकानीपछि २० करोड रुपैयाँमा कुरा मिल्यो । तस्कर उनीहरुलाई भेट्न मूर्ति लिएर आउन राजी भए ।
उनीहरुबीच सुरुमा तुलसीपुर उपमहानगरपालिका–४ गणेशपुरस्थित पार्क नजिकैको जंगलमा चैत १४ गते भेट्ने कुरा भयो । मूर्ति तस्कर र ग्राहकको भेषमा पुगेका प्रहरीबीच भेट भयो । तर, एम्बुलेन्सले साइरन बजाएको सुनेपछि प्रहरी आएको आशंकामा तस्करहरु भागे । सुनको मूर्ति नियन्त्रणमा लिने प्रहरीको सपना सपनामै सीमित बन्यो । प्रहरीले ग्राहक बनेर उनीहरुको पिछा गर्न छाडेन ।
चैत २१ गते प्रहरी उनीहरुलाई भेट्न छिमेकी जिल्ला सल्यानको कपुरकोट पुग्यो । त्यहाँ पनि भेट भयो । तर, कुरा मिलेन । फेरि उनीहरुबीच तेस्रोपटक भेट्ने कुरा भयो । गएराति ग्राहक बनेको प्रहरी र तस्करबीच तुलसीपुर–सल्यान सडक खण्डको हर्नेटी स्कुल पछाडि भेट्ने कुरा भयो । दुवै समूह रातको करिव १० वजे त्यहीँ पुगे । ग्राहक बनेर पुगेका साधा पोशाकका प्रहरीलाई सुन तस्करको सुरक्षामा खुकुरी र तरबारसहित खटिएको करिव २०–२५ जनाको जत्थाले घेरिसकेको थियो । तस्करले मूर्ति देखाए ।
जब तस्करले मूर्ति बोराबाट निकाले तब ग्राहकको भेषमा पुगेका प्रहरीले आफू प्रहरी भएको भन्दै असली परिचय दिए । प्रहरी भन्ने चिन्नासाथ तस्कर खिमलाल केसीले प्रहरीलाई ढुंगा हान्न खोजे । लगत्तै प्रहरीले आफूसँग भएको पेस्तोल निकाले । प्रहरीले पेस्तोल निकालेपछि तस्करको सुरक्षार्थ खटिएको जत्था नजिकै आयो । तस्कर छवि भण्डारीले प्रहरीको टाउकोमा ताकेर खुकुरी हान्न थालेकै बेला प्रहरीले चार राउन्ड गोली चलायो ।
प्रहरीले गोली चलाएपछि तस्करको भागाभाग भयो । प्रहरीको टाउकोमा गोली हान्न खोज्ने तस्कर भण्डारीको खुट्टामा गोली लाग्यो । प्रहरीले सुनबाट निर्मित गौतम बुद्धको मूर्तिसहित भण्डारीलगायत चारजना तस्करलाई नियन्त्रणमा लिन सफल भयो । उनीहरु चारैजना दाङ प्रहरीको हिरासतमा छन् र अनुसन्धान जारी छ । प्रहरीले यो घटनाबारे जानकारी बाहिर समेत ल्याएको छैन । समाचार गणतन्त्र दैनिकले छापेको छ ।
