घोराही, जेठ १३/ पत्रकार तथा साहित्यकार सहिद कृष्ण सेन इच्छुकको स्मृति दिवसमा दाङमा कार्यक्रम गरिएको छ । तीन संस्थाको संयुक्त आयोजनामा गरिएको स्मृति दिवसमा जिल्लाका २ जना पत्रकार र एक जना साहित्यकारलाई सम्मान गरिएको छ ।

सेनको १५ औँ स्मृति दिवसको अवसरमा शनिवार घोराहीमा आयोजित कार्यक्रममा पत्रकार उदय जिएम, नरेन्द्र के.सी र साहित्यकार नदिराम केसीलाई सम्मान गरिएको हो । नेपाल पत्रकार महासंघ दाङ, प्रेस सेन्टर नेपाल दाङ, जनसांस्कृतिक महासंघ दाङको संयुक्त आयोजनामा भएको सेनको १५ औं स्मृति दिवस एवम् पुरस्कार वितरण समारोहमा उनीहरुलाई सम्मान गरिएको हो ।

प्रत्यक वर्ष सेनको स्मृति दिवसको अवसरमा नेपाल पत्रकार महासंघ दाङ, प्रेस सेन्टर नेपाल दाङ, जनसांस्कृतिक महासंघ दाङले एक एक जना स्रष्टालाई सम्मान गर्दै आएका छन् । सो अवसरमा बोल्ने वक्ताहरुले सेन नेपाली राजनीति, पत्रकारिता, साहित्यका धरोहर भएको भन्दै उहाँका विचार र आर्दश मनन योग्य भएको बताएका थिए ।

नेपाल पत्रकार महासंघ दाङ शाखाका अध्यक्ष सविन प्रियासनको अध्यक्षता एवं बरिष्ठ पत्रकार नारायणप्रसाद शर्माको प्रमुख आतिथ्यतामा भएको कार्यक्रममा प्रेस स्वतन्त्रता सेनानी सुशील गौतम सेनको व्यक्तित्वका बारेमा चर्चा गर्नुभएको थियो ।