दाङ, जेठ २ । गतवर्षको बाढीपहिरोमा घरपरिवारविहीन भएका प्युठानका बालबालिकाका लागि १ वर्षसम्म पुग्ने गरी शैक्षिक सामग्री वितरण गरिएको छ । दोहा कतारमा रहेका प्यूठानीहरूको सहयोगमा स्थापना गरिएको प्यूठान सेवा समाज बालबालिका संरक्षण तथा उद्धार कोषले उक्त सामग्री वितरण गरेको हो ।गतवर्षको साउनमा एकै ठाउँमा २४ जनाको मृत्यु हुने गरी प्यूठानको फोप्लीमा बाढीपहिरो गएको थियो । उक्त संस्थाले हिमानी बुढाथोकी (बुबाआमा दुवैको मृत्यु), शोभी पुन मगर (अभिभावकविहीन), जीवन पुन मगर (घरबारविहीन), सुनीता परियार (घरबारविहीन), खीमप्रसाद सुवेदी (घरबारविहीन), झगेन्द्र पुन, रामबहादुर घर्तीलगायतलाई शैक्षिक सामग्री वितरण गरेको छ ।
उनीहरूलाई १ वर्षसम्म पुग्नेगरी झोला, कापी, कलम, विद्यालय पोशाक, जुत्ता, जेमोटिबक्सलगायतका सामग्री वितरण गरेको हो । कोषमा अहिले दोहा कतारमा रहेका प्यूठानी, प्यूठानका अगुवा नागरिकहरू र सञ्चारक्षेत्रका प्रतिनिधिहरूको समेत सहभागिता रहेको छ । कोषलाई यस वर्षको अन्तिमसम्ममा रू १० लाखसम्म पुर्याउने र सोही रकमको ब्याजबाट वार्षिक १० जना बालबालिकालाई सहयोग गर्ने लक्ष्य रहेको कोषका अध्यक्ष तथा प्यूठान सेवा समाज दोहा कतारका अध्यक्ष मानबहादुर केसीले बताए ।
अभियानबाट
